Naudetatane kan gjere ein betre jobb for innbyggjarane med det nye naudnettet, meiner politiet. Dei hyllar det nye digitale radiosambandet og meiner det vil gjere fylket til ein tryggare stad å bu, skriv NRK Hordaland.
– Me kan vel seie det slik at me kosar oss, seier Terje Tonning.
Han har hatt ansvaret for overgangen frå analogt til digitalt radiosamband i politiet i Haugaland og Sunnhordland politidistrikt.
Berre seks dagar etter at dei begynte å bruke det nye naudnettet, konkluderer Tonning allereie med at det gjer arbeidskvardagen langt betre for politiet sør i fylket.
– Det har svart til forventningane, og me har fått gode tilbakemeldingar frå brukarane. Det er ingen som ynskjer å gå attende til det me hadde, seier Terje Tonning.
– Kva er dei største fordelane med det nye naudnettet?
– Dette verkar heile tida, og det verkar så godt som over alt. Det har ein talekvalitet som er så godt at du nesten kikkar rundt deg for å sjå om han som snakkar til deg står rett bak deg, seier Tonning.
Med eit tastetrykk skal politiet også ta med brannvesenet og Akuttmedisinsk kommunikasjonssentral (AMK) i samtalen.
Brannsjef på Stord, Børge Presthaug meiner dette vil gjera Sunnhordland til ein tryggare stad å bu, når dei er klare for det nye naudnettet rett over nyttår.
– No når me har hatt dekningsprøve på det nye så har me dekning over heile Stord, til og med oppe i fjella der me aldri har hatt dekning før, seier han.
Les meir om saka hjå NRK